រាជធានីភ្នំពេញ ៖ ជំរឿនទូទៅប្រជាជនឆ្នាំ២០១៩ របស់វិទ្យាស្ថានជាតិស្ថិតិក្រសួងផែនការប្រជាជនរស់នៅរាជធានីភ្នំពេញមានសរុបចំនួន ២លាន ១សែន ២ម៉ឺន ៩៣៧១នាក់។ ក្នុងនោះរាជធានីភ្នំពេញបែងចែកចេញជា ខណ្ឌ១៤ និងសង្កាត់ ១០៥។ ក្នុងចំណោមខណ្ឌទាំង ១៤ នោះ គឺមានខណ្ឌ ២ ដែលទើបបង្កើតថ្មី កាលពីខែមករាកន្លងទៅ គឺខណ្ឌបឹងកេងកង និងខណ្ឌកំបូល។ ខណ្ឌថ្មីទាំង២ នោះ បានកាត់សង្កាត់មួយចំនួនពីខណ្ឌផ្សេងៗ ពោលគឺខណ្ឌបឹងកេងកង កាត់ ៧​សង្កាត់​ពី​ខណ្ឌ​ចម្ការ​មន​ ចំណែកឯខណ្ឌកំបូល កាត់យក ៦សង្កាត់ពីខណ្ឌពោធិសែនជ័យ និង ១សង្កាត់ ពីខណ្ឌដង្កោ។ តើ​ក្នុង​ចំណោម​ខណ្ឌ​ទាំង​១៤​របស់រាជធានីភ្នំពេញនោះ​ តើ​ខណ្ឌមួយ​ណាមាន​ចំនួន​សង្កាត់តិច​ជាង​គេ និងខណ្ឌមួយណាដែលមានសង្កាត់​ច្រើនគេ? ១/ ខណ្ឌដែលមានសង្កាត់តិចជាងគេមាន៣ ៖ -ខណ្ឌជ្រោយចង្វារមាន៥សង្កាត់ ក្នុងនោះមាន ៖ សង្កាត់ជ្រោយចង្វារ, សង្កាត់ព្រែកលៀប, សង្កាត់ព្រែកតាសេក,សង្កាត់កោះដាច់ និង​សង្កាត់បាក់ខែង។ -ខណ្ឌចម្ការមន ចែកចេញជា ៥សង្កាត់ ក្នុងនោះមាន ៖ សង្កាត់ទន្លេបាសាក់, សង្កាត់ទួលទំពូងទី ១, សង្កាត់ទួលទំពូងទី២, សង្កាត់បឹងត្របែក និងសង្កាត់ផ្សារដើមថ្កូវ។ -ខណ្ឌព្រែកព្នៅ មាន ៥សង្កាត់ ក្នុងនោះមាន ៖ សង្កាត់ព្រែកព្នៅ, សង្កាត់ពញាពន់, សង្កាត់ សំរោង, សង្កាត់គោករកា និងសង្កាត់ពន្សាំង។ ២/ ខណ្ឌដែលមានសង្កាត់ច្រើនជាងគេ ៖ -ខណ្ឌដង្កោ មាន ១២សង្កាត់ ក្នុងនោះមាន ៖ សង្កាត់ដង្កោ, សង្កាត់ពងទឹក, សង្កាត់ព្រៃវែង, សង្កាត់ព្រៃស, សង្កាត់ក្រាំងពង្រ, សង្កាត់សាក់សំពៅ, សង្កាត់ជើងឯក, សង្កាត់គងនយ, សង្កាត់ព្រែកកំពឹស, សង្កាត់រលួស, សង្កាត់ស្ពានថ្ម និងសង្កាត់ទៀន៕